Article 17 — Protection and Security of Personal Data

፩/ በዲጂታል መታወቂያ ሥርዓት የተሰበሰበ ማንኛውም የተመዝጋቢ ግላዊ መረጃ ባለቤት ተመዝጋቢው በመሆኑ፤ በማንኛውም የዲጂታል መታወቂያ አሠራር ሥርዓት ውስጥ አገልግሎቶችን ለማግኘት የሚደረጉ የማረጋገጥ ተግባራት በተመዝጋቢው ፈቃድ መደረግ አለባቸው:: ፪/ ወደ ዲጂታል መታወቂያ ሥርዓት የሚገቡ መረጃዎችን በመሰብስብ፣ በመመዝገብ፣ በማረጋገጥ እና ይዞ በማቆየት ሂደት ባሉ ተግባራት ውስጥ የተመዝጋቢ መረጃዎች ሚስጢራዊነት የተጠበቀ እንዲሆን ተቋሙ ማረጋገጥ አለበት:: ፫/ በዚህ አዋጅ አንቀጽ ፮ ንዑስ አንቀፅ (፫) በተቀመጠው መርህ መሠረት ለዲጂታል መታወቂያ ሥርዓት የሚሰበሰቡ መረጃዎች፤ ነዋሪዎችን በልዩ ሁኔታ ለመለየት የግዴታ የሚያስፈልጉና ሥርዓቱን በቀጥታ ከሚደግፉ በስተቀር ሌሎች መረጃዎች ሊሰበሰቡ አይችሉም:: ፬/ ማንኛውም ሰው ተመዝጋቢ ፈቃዱን በግልጽ ሳይሰጥ በዲጂታል መታወቂያ ሥርዓት የተመዘገቡ የግል መረጃዎችን መውሰድ፣ ማሰራጨት፣ ማተም፣ መጠቀም፣ መረጃውን መስጠት ወይም ቅጂውን ለሶስተኛ ወገኖች ወይም አካላት መስጠት ወይም ይፋ ማድረግ የተከለከለ ነው:: ፲፬ሺ፯፻፴፪ ፭/ አሠራርና ሕግን ጠብቆ በዲጂታል መታወቂያ ሥርዓት ለተሰበሰበ የማንኛውም ተመዝጋቢ ግላዊ መረጃ ያለ ተመዝጋቢው ፈቃድ ለሌላ ሰው መግለጽ፣ ማስተላለፍም ሆነ እንዲለወጥ መፍቀድ የተከለከለ ነው:: ፮/ በዚህ አንቀጽ ንዑስ አንቀጽ (፭) ላይ የተደነገገው ቢኖርም፣ በሕግ ሥልጣን ለተሰጠው ወይም በፍርድ ቤት ትዕዛዝ መሠረት የግል መረጃው ለሚመለከተው ሕጋዊ አካል ሊገለጽ ወይም ሊተላለፍ ይችላል:: ፯/ በዲጂታል መታወቂያ ሥርዓት የተሰበሰቡ ግላዊ መረጃን የማያጋልጡ የተጨመቁ ዲሞግራፊክ ሪፖርቶች እና የስታትስቲክስ መረጃዎችን በሕግ ለተፈቀደላቸው አካላት በተቋሙ አሠራር መሠረት ሊሰጡ ይችላሉ:: ፰/ ከዲጂታል መታወቂያ ቋት አሠራሩን ጠብቆ ለተጠቃሚ አካላት የተላለፈ የተመዝጋቢ መረጃ የሚያገለግለው ወይም ጥቅም ላይ የሚውለው ለተፈለገው አገልግሎት ብቻ ሲሆን፤ መጀመሪያ ከተላለፈበት ዓላማ ባልወጣ መልኩ ተጠቃሚው አካል ይህንን መረጃ በራሱ ቋት ውስጥ ማስቀመጥና ለራሱ አገልግሎት ብቻ መጠቀም ይችላል:: ፱/ በዚህ አንቀጽ ንዑስ አንቀጽ (፯) የተጠቀሰው እንደተጠበቀ ሆኖ፤ ተጠቃሚ አካላት በተመዝጋቢው ፈቃድ ያገኙትን መረጃ፣ መረጃውን ከወሰዱበት ዓላማ ውጪ ለራሳቸው መጠቀምም ሆነ ለሶስተኛ ወገን አሳልፎ መስጠት የተከለከለ ተግባር ነው:: ፲፬ሺ፯፻፴፫ ፲/ በምዝገባ ወቅት በዲጂታል መታወቂያ ሥርዓት የሚዘጋጅ የተመዝጋቢውን ሙሉ ፈቃድ፣ መብት እና ግዴታዎች የሚገልፅ የፈቃደኝነት ቅፅ በተመዝጋቢው መሞላትና መፈረም አለበት። ፲፩/ በዚህ አንቀጽ ንዑስ አንቀጽ (፲) ላይ የተጠቀሰው እንደተጠበቀ ሆኖ፤ በምዝገባ ወቅት ለተመዝጋቢ ምስክር ሆኖ ለሚቀርብ ሰው፤ በተቋሙ የሚዘጋጅ የምስክሩን ሙሉ ፈቃድ፣ መብት እና ግዴታዎች የሚገልፅ የፈቃደኝነት ቅፅ በምስክር መሞላትና መፈረም አለበት፤ የምስክሩ ልዩ ቁጥር ወይም የምዝገባና የማንነት ማረጋገጫ ሰነዶች በቅጹ ላይ መሞላት እና በዲጂታል መታወቂያ ሥርዓቱ ተመዝግቦ መያዝ አለበት። ፲፪/ በዲጂታል መታወቂያ ሥርዓት የተሰበሰቡ መረጃዎች ከተለያዩ የተፈጥሯዊም ሆነ ሰው ሰራሽ አደጋ፣ የኤሌክትሮኒክ መንገዶችን በመጠቀም ከሚደርሱ ጥቃቶች፣ ከስርቆት፣ ከመጭበርበር እና መሰል የወንጀል ጥፋቶች የሚከላከል ደኅንነቱ የተጠበቀ የሕግና አስተዳደር ሥርዓት መዘርጋት እንዲሁም ጠንካራ የቴክኒክና የደኅንነት ሥርዓት መተግበር አለበት። ፲፫/ ለዲጂታል መታወቂያ ሥርዓት የተሰበሰቡ የግል መረጃዎች፣ ለአጠቃቀም አመቺ በሆነ አኳኋን በሥርዓት ተደራጅተው ተቋሙ በሚያስተዳድረው የመረጃ ቋት ውስጥ መቀመጥ አለባቸው። ፲፬ሺ፯፻፴፬