Article 11 — Unique Number Issuance

፩/ መዝጋቢው አካል በዚህ አዋጅ አንቀጽ ፱ የተዘረዘሩትን የተመዝጋቢ መረጃዎች መዝግቦ ወደ ሥርዓቱ ካስገባ በኋላ፣ ተቋሙ አንድ ነዋሪ ከሌላ ነዋሪ በልዩነት እና በአስተማማኝነት ለመለየት የሚያስችል ልዩ ቁጥር ለእያንዳንዱ ተመዝጋቢ መስጠት ይኖርበታል፤ ፪/ ልዩ ቁጥሩ ኤሌክትሮኒክ በሆነ ሥርዓትና በሚስጥራዊ መንገድ የሚመነጭ ሲሆን ከቁጥሩ ጀርባ ያለውን ዝርዝር መረጃ እና ግላዊነት የሚጠብቅ ይሆናል፤ ፫/ አንድ ልዩ ቁጥር ለአንድ ተመዝጋቢ ብቻ የሚሰጥ ሲሆን፤ ይህ ልዩ ቁጥርም በቋሚነት ሳይቀየር ከተመዝጋቢው ጋር ይተሳሰራል፤ ፬/ በዚህ አንቀጽ ንዑስ አንቀጽ (፪) የተጠቀሰው ልዩ ቁጥር እንደተጠበቀ ሆኖ በተቋሙ አሠራር ለተለያዩ የሥራ ዘርፎች፣ በተለየ መልኩ ወይም በተመዝጋቢው ፍላጎት፣ ከልዩ ቁጥር ጋር በሚስጥራዊ ሁኔታ የተያያዙ፣ የተመዝጋቢን ግላዊነት ለመጠበቅ የሚያስችሉ፣ የራሳቸው ጊዜ ገደብ ያላቸው፣ ልዩ ቁጥሩን ተክተው መሥራት የሚችሉ ተለዋጭ ቁጥሮች ማመንጨት ይቻላል፤ ፭/ በዚህ አንቀጽ ንዑስ አንቀጽ (፪) የተጠቀሰው ልዩ ቁጥር የማይለወጥ ሲሆን፣ የተመዝጋቢውን የመረጃ ደኅንነት ለመጠበቅ ሲባል በማስረጃ ላይ የሚታተመውና በሌሎች ሁኔታዎች ጥቅም ላይ የሚውለው ቁጥር በተለዋጭ ቁጥር ሊተካ ይችላል፤ ፲፬ሺ፯፻፳፮ ፮/ የዲጂታል መታወቂያ ልዩ ቁጥር የጠፋበት ማንኛውም ሰው ልዩ ቁጥሩ ስለመጥፋቱ ለዲጂታል መታወቂያ ተቋም ወይም ተቋሙ ከወከለው አካል ተገቢውን ክፍያ በመፈፀም በተቋሙ አሠራር መሠረት ቁጥሩን መልሶ ማግኘት ይችላል፤ ፯/ በዚህ አንቀጽ ንዑስ አንቀጽ (፬) የተመለከተው እንደተጠበቀ ሆኖ፤ በተቋሙ አሠራር መሰረት የተመዝጋቢው ሞት ከተረጋገጠ፤ ተቋሙ ልዩ ቁጥሩ ሳይቀየር እንደፀና እንዲቆይ እና ለማረጋገጥ አገልግሎት ሥራ ላይ እንዳይውል የማድረግ ሃላፊነት ይኖርበታል፤ ፰/ በዚህ አንቀጽ ንዑስ አንቀጽ (፫) ላይ ያለው ድንጋጌ እንደተጠበቀ ሆኖ፤ በተመዝጋቢው ፍላጎት ወይም በፍርድ ቤት ትዕዛዝ የዲጂታል መታወቂያ ልዩ ቁጥር ሊቆለፍ ወይም ከሥራ ውጪ እንዲሆን ሊደረግ ይቻላል፤ ዝርዝር አፈፃፀሙ ተቋሙ በሚያወጣው መመሪያ የሚወሰን ይሆናል።